Ukrayina Rusiyege kökte tınçlıqnı defalarca teklif etken edi — Moskva bunı ep boza edi, amma dünyanıñ basqısını köz ögüne almağa başlağanı müimdir, dep bildirdi prezident Volodımır Zelenskıy.
"Rusiyege kökte tınçlıqnı teklif etken edik. Raketa ve uçucısız uçaqlarnıñ, umumen, grajdan infrastrukturalarına ve hususan energetikağa ücüm etmemesi. Bütün bular ruslar tarafından bozulğan edi. Ve pek tsinik. "Şahedler"nen urmasalar bile, "transformatorlarğa" urdılar", — dedi o video muracaatında.
Moskva vatandaşlarğa qarşı terrornı bir kün bile toqtatmadı, cebede de bir kün bile tolu tınçlıq olmadı dep qayd etti Zelenskıy.
"Ve cenkniñ esas sebebi — rusiyelilerniñ qomşularınıñ ayatını nezaret etmek, qomşularını boysundırmaq, qomşularını öldürmek istegi. Bu olmasa edi, cenk olmaz edi", — dep qayd etti o.
Zelenskıynıñ qayd etkenine köre, Moskvada dünyanıñ basqısını, yani cenk içün daa sert cezalar telükesini köz ögüne almağa başlağanları pek müimdir.
Kreml ekinci sanktsiyalar telükesiniñ ögüni almaq içün Ukrayina ile ava barışığından da ibaret ola bilecek uzlaşuv variantlarını ABD prezidenti Donald Trampqa teklif etmeki tüşüne, dep yazdı Bloomberg arman ayınıñ 5-nde.
