Eñ azından 284 Ukrayina vatandaşı, şu cümleden Qırımdan, siyasiy ya da diniy sebeplerden Rusiyede ya da işğal etilgen topraqlarda apishanelerde buluna. Bu aqta Qırım aq qorçalayıcı gruppasınıñ maruzasında aytıla.
Hususan, eñ az 109 insan "Qırım musulmanları davası" boyunca qanunsız sürette apiske alındı.
"Ukrayina diversantları ve casusları davaları" boyunca apiste eñ az 102 Ukrayina vatandaşı buluna, olarnıñ arasında — Qırımda tutulğanlar (2014 senesinden berli), em de eñ az 39 kişi Zaporijjâ ya da Herson vilâyetlerinde 2022 senesi kiçik aynıñ 24-nden soñ hırsızlanıp, Qırım SİZO-sına alıp ketirildi.
Noman Çelebicihan batalyonında iştirak etkeninde qabaatlanğan eñ azından 36 insan azatlıqtan marum etildi. Bundan ğayrı, eñ az 17 qırımlı jurnalist ve eñ az 13 "İyegova şaatı" apiste buluna.
Daa evel Qırımda 2024 senesi baarde ğayıp olğan üç qadınnıñ tutulğanı tasdıqlandı. Larisa Gayday, Tatyana Pavlenko (Simonenko) ve Elvira Aboyazova Aqmescitniñ 2-nci SİZO-sında bulunalar. QRM-niñ malümatına köre, Rusiye akimiyeti tutulğanınıñ sebebini ve qabaatlavlarnı aydınlatmay.
QRM-niñ malümatına köre, işğal etilgen Qırımdan eñ azından 26 qadın yarımada ve Rusiyeniñ tahqiqat izolâtorlarında ya da tüzetüv koloniyalarında qanunsız alda buluna.
