İşğal etilgen Qırımda bu sene yabaniy meyva terekleri ve çalı terekleriniñ bereketsizligi qayd etile. Bu aqta Qırım.Aqiqatqa Qarasuvbazarlı ülkeşınas adını bildirilmemek şartınen aytıp berdi.
Ülkeşınasnıñ malümatına köre, bereketsizlikniñ sebebebi bu yıl ava-iqlim şaraitleri pek yaramay olğanıdır.
"Baar ayazları ve şiddetli qurğaqlıq öz işini yaptı — Qırımda yabaniy tereklerniñ daa evel iç olmağan bereketsizligi közetilmekte, bu ise köylülerge ağır tesir ete, çünki Qırımnıñ köylerinde yaşayış seviyesiniñ tüşmesi şaraitlerinde toplama işleri aile bücetiniñ müim qısmı ola. Amma tek tabiat faktorları degil — yerastı suvlarnıñ aşırı çıqarılması, suv anbarlarınıñ alçaq seviyesi, şahtalarnıñ inkişafı — bularnıñ episi yerastı suvlarnıñ çekilmesine ketire, neticede terekler zarar köre. Keçken sene qırmızı suv kütleviy surette qurudı. Bu sene qızıl meyvaları aman-aman yoq", — dep tarif etti ülkeşınas.
Ülkeşınasnıñ qayd etkenine köre, bu sene bir sıra yabaniy meyva tereginiñ bereket bermegeni qayd etilmekte.
İşğal etilgen Qırımda kütleviy şekilde bereketsizlik közetilmekte, bir qaç regionda fevqulâde vaziyet ilân etildi. Yerli Rusiye akimiyeti Qırımdaki on biñlernen gektar ekin ve bağnı yoq etken global iqlim deñişüvini qabaatlay. Qırım yarımadasında ava vaziyetiniñ deñişüvi ise suv qıtlığından sebep kerginleşe.
